Blusen eta Nesken Elkarteak eta Vitoria-Gasteiz Wine City elkarteak jai-egitarauan dagoeneko finkatuta dagoen proba honen beste edizio bat antolatu dute, Gasteizko Udalak bultzatuta eta Vital Fundazioaren babes nagusiarekin
Uztailaren 25ean, Blusen eta Nesken Egunean, Gasteizko kuadrillek giro onez, kolorez eta umorez beteko dute erdigunea, Ardo Upelen IX. Lasterketa dela eta; izan ere, ekitaldi hori eguneko ekitaldirik berezi eta preziatuenetakoa da, tradizioa, herri-kirola, ardoa eta lurraldearen sustapena uztartzen baititu.
Blusen eta Nesken Elkarteak eta Vitoria-Gasteiz Wine City elkarteak antolatu dute Ardo Upelen IX. Lasterketa, Gasteizko Udalaren bultzadarekin eta Vital Fundazioaren babes nagusiarekin. Aurtengo edizioaren upategi babeslea Bodegas Alútiz izango da. Parte-hartzaileei botila bana ardo emateaz gain, talde irabazleak jasoko duen upela ere emango du.
Lasterketa Santiago Eguneko jaien erakargarri turistiko eta dibertigarrietako bat da jada, eta, aurten ere, Plaza Berrian eta inguruko kaleetan egingo da. Publikoari Arabako Errioxako ardoaren kultura hurbilduko dio, eta lurraldeko produkturik adierazgarrienetako baten garrantzia azpimarratuko du.
Bederatzigarren edizio honetan, lasterketak aparteko gonbidatu bat izango du: Gorka Aguinagalde aktore eta umorista; hark emango du lasterketa abiatzeko ohiko banderakada.
Gasteizen jaio zen Aguinagalde, eta ibilbide profesional luzea du antzerkian, zineman eta telebistan. Hainbat lanetan hartu du parte: 27 film luzetan, 25 film laburretan, 30 antzezlan baino gehiagotan eta, besteak beste, Allí Abajo, Cuéntame cómo pasó eta Benidorm telesail ezagunetan. Film luzeetatik, Airbag, La Comunidad, Abuela Tremenda eta El carné aipa daitezke, Álex de la Iglesia, Daniel Monzón eta Juanma Bajo Ulloa zuzendarien agindupean eginak.
