Azokan parte hartu nahi duten liburu dendek informazioa eskatu eta haien interesa adierazi ahal izango dute ferialibro@vitoria-gasteiz.city helbide elektronikoaren bidez
Gasteizko Udalak epea ireki du hiriko liburu dendek datorren udazkenean egingo den Liburu Azokan parte hartzeko izena eman dezaten. Azokan sektoreko profesionalak, egileak eta irakurleak bilduko dira, liburuaren eta irakurketaren inguruan, eta, Kultura Zerbitzuak bultzatuta, hiriko liburu dendei laguntzeko, liburuaren sektorea indartzeko eta kultura-bizitza dinamizatzen lagunduko duen topagune bihurtzeko helburuarekin sortu da.
Sonia Diaz de Corcuera Kultura zinegotziak azokaren etapa berri honetan sektorearen inplikazioa izatearen garrantzia azpimarratu du. «Liburu Azoka hau Gasteizko liburu denden eskutik sortzea nahi dugu. Liburu denda horiek funtsezko kultura-eragilea dira, eta ezinbesteko zeregina betetzen dute irakurzaletasuna sustatzen eta kultura hedatzen. Haien parte hartzea ezinbestekoa izango da ekimena arrakastatsua izan dadin», adierazi du.
Azokan parte hartu nahi duten liburu dendek informazioa eskatu eta haien interesa adierazi ahal izango dute ferialibro@vitoria-gasteiz.city helbide elektronikoaren bidez. Izena emateko epea uztailaren 28ra arte egongo da zabalik.
Liburu dendei eta liburugintzako profesionalei laguntzeko, irakurketa sustatzeko eta hiriko kultura-eskaintza zabaltzen jarraitzeko Udalak hartu duen konpromisotik dator ekimena, eta egitarauak liburu denden presentzia, adin desberdinetako publikoentzako jarduerak eta irakurketa herritarrengana hurbiltzeko proposamenak uztartuko ditu.
«Irakurzaletasuna hiri bateko bizitza kulturalaren parte da, eta azoka hau liburuez gozatzen dutenentzako, sortzen dituztenentzako eta liburu dendetatik egunero herritarrengana hurbiltzen dituztenentzako topagune bihurtzea nahi dugu. Gasteizko kultur agendan erreferentziazko hitzordua izatea nahi dugu», nabarmendu du Diaz de Corcuerak.
Gasteizko Udalak hiriko liburu denda guztiak animatu ditu proiektu honekin bat egitera, hiriko udazkeneko hitzordu kultural nabarmenetako bat bihur dadin.
